Joh 17 | MED | STEP | Wote, Jisas ndi, ik nimbᵾ, nimba pora ndupa, tᵾpa oⱡa ndupa, muⱡ kona kandpa, nimba mel, “Wuta ye! Ui ei, nondpa enim, nim nga uⱡ eng nui mbᵾ kangnᵾm kᵾn, etkᵾn mot ndui! Wote kangnᵾm ndi, nim nga uⱡ eng nui mbᵾ, etpa mot ndumba!

John 17

Jisas Ndi Elim Nga Kitip Kᵾni Wu Kᵾⱡ nga Atinga Rundrum

1 Wote, Jisas ndi, ik nimbᵾ, nimba pora ndupa, tᵾpa oⱡa ndupa, muⱡ kona kandpa, nimba mel, “Wuta ye! Ui ei, nondpa enim, nim nga uⱡ eng nui mbᵾ kangnᵾm kᵾn, etkᵾn mot ndui! Wote kangnᵾm ndi, nim nga uⱡ eng nui mbᵾ, etpa mot ndumba! 2 Nim ndi, kangnᵾm ronduⱡ ngurun ei ndi, mᵾi kona wamp mormᵾn mbᵾ pora, rᵾp etmba. Ei nga, wamp mat ninim ndi, kangnᵾm ngurun nimbᵾ, uⱡ nga kᵾnt nga kont mul uⱡ ei ngumba. 3 Wote, uⱡ nga kᵾnt nga kont mul uⱡ ei, ei mel, nim Got kupa morᵾn nᵾk pilik, wote Jisas Kraist nim ndi, tᵾkᵾn mundrun nᵾk piling. 4 Na ndi, nim nga uⱡ eng nui mbᵾ, ya mᵾi kona ila tᵾp ora ndur. Nim nga kongun na ngurun nimbᵾ, etᵾp pora ndont. 5 Wuta, muⱡ mᵾi raⱡ pi nᵾpi kᵾn, na nga uⱡ eng nui mat, nim kᵾn kunda tep murumbᵾⱡ. Nimbᵾ, akup nanim ngui! 6 Nim ndi, mᵾi kona ila wu mat, ekit tᵾkᵾn, na ngurun wu nimbᵾ, nim nga mbi ei, pileing nᵾmp kundᵾp nit. Wu mbᵾ, nim nga mbᵾ, wote nim ndi, tᵾkᵾn na ngurun. Wu mbᵾ ndi, nim nga ik ei, pilik teng ndurmin. 7 Nim ndi, mel mat, na ngorun mbᵾ, akup nim kᵾn tepa orum nᵾk pᵾtmᵾn. 8 Nim nga ik, na nᵾkᵾn ngurun nimbᵾ, kundᵾp nilimba, pilik tᵾtmᵾn. Na nim kᵾn moⱡᵾp ur. Wote nim ndi, na tᵾkᵾn mundrun nᵾk, ik kupa ei, mondᵾk pᵾtmᵾn.

9 Na ndi, wu kᵾⱡ nga nindᵾp atinga ront. Mᵾi kona wamp mbᵾ nga mon. Nambuⱡ emel, wu kᵾⱡ nim nga. 10 Na tep mor mel mbᵾ, nim nga. Wote nim tekᵾn morᵾn mbᵾ, na nga. Mel mbᵾ ndi, na nga mbi ei, etᵾk eng nondᵾrmᵾn. 11 Akup na mᵾi kona wak rop, nim kᵾn uimp. Wote wu kᵾⱡ, mᵾi kona ila muⱡing. Wuta Wingti ye! Nim nga ronduⱡ, na kᵾn tetᵾm ila ku, wu kᵾⱡ rup etkᵾn, kai mundi! Nim kᵾn, na kᵾn, tenda purum ei mel, wu kᵾⱡ i ku etᵾk muⱡeing. 12 Na wu kᵾⱡ kᵾn, murmᵾn ei kᵾn, nim nga mbi ronduⱡ ei tᵾp, wu kᵾⱡ rᵾp etᵾp kai mundᵾr. Na ndi, wu kᵾⱡ, rᵾp etᵾp kai mondᵾⱡᵾmba. Wu ti, tiki puⱡi pi nᵾpᵾrᵾm. Wote, wamp tenda ti, mba tiki purum ei, kit moⱡmba wamp ei, Buk Wingti ila petᵾm ik ei omba, kupa etmba ei nga etmba. 13 Ei nga, akup na nim kᵾn uimp. Ya mᵾi kona ila moⱡᵾp, ik nᵾnt mbᵾ ndi, na nga ambuⱡpa pᵾl uⱡ ei, wu kᵾⱡ nga numan orunga, peka ropa muⱡangga. 14 Nim nga ik ei, nᵾmp nguⱡmba mᵾi kona wamp mbᵾ ndi, wu kᵾⱡ numan ngui nganggᵾrmᵾn. Ei nambuⱡ emel, na mᵾi kona wu ti mon. Ei mel, wu kᵾⱡ mᵾi kona wu kat mon. 15 Ya mᵾi kona ila wu kᵾⱡ, ekit tᵾn nᵾmp waldᵾp ni nanᵾnt. Wote wu kᵾⱡ, wu kit ei ndi, etpa kit mondᵾmba ei nga rᵾp etkᵾn, kai mundun nᵾmp nᵾnt. 16 Na ya mᵾi kona ila wu ti mon. Ei mel ku, wu kᵾⱡ, ya mᵾi kona ila wu kat mon ku. 17 Nim nga ik kupa ei ndi, wu kᵾⱡ mbo endkᵾn, etkᵾn wingti rundi! Nambuⱡ emel, nim nga ik ei ama kupa. 18 Na mᵾi kona ila, nim ndi, tᵾkᵾn mundrun ei mel, na ndi, wu kᵾⱡ mᵾi kona ila tᵾp mundunt. 19 Na nga mul uⱡ ei, wu kᵾⱡ nga nindᵾp, nim ngunt. I ent uⱡ ei ndi, wu kᵾⱡ etpa, nim nga wu wingti kupa kᵾⱡ mundangga!

20 Na ndi wu kᵾⱡ nga mendpᵾⱡ, atinga rui narᵾnt mon. Ya wu kᵾⱡ nga ik ei, pilik tᵾk, na mondᵾk piling wamp mbᵾ nga pendᵾp atinga rondᵾnt. 21 Wuta, na nim kᵾn moⱡmba, nim na kᵾn morᵾn ei mel nᵾnt, Wamp mbᵾ i ku etᵾk, muⱡeing nᵾmp atinga rondᵾnt. Wamp tenda mel ralk, moⱡᵾng uⱡ ei ndi, mᵾi kona wamp mbᵾ, ora nduk, nim ndi, na tᵾkᵾn mundrun nᵾk, mondᵾk piling. 22 Nim nga mbi ei, tᵾp ou ndup, uⱡ ronduⱡ na ngurun nimbᵾ, wamp kᵾⱡ ngur. Nambuⱡ emel, nim na kᵾn numan tenda petᵾm ei mel, wamp kᵾⱡ numan tenda pangga muⱡeing. 23 Na wamp kᵾⱡ kᵾn mor. Wote nim na kᵾn morᵾn. Wote, nim ndi, na numan ngorun ei mel, wamp kᵾⱡ i ku etkᵾn, numan ngana, numan tenda pangga muⱡeing. Wote mᵾi kona wamp mbᵾ ndi kandᵾk kᵾn, nim ndi, na tᵾkᵾn mundrun nᵾk pileing. 24 Wuta! Nim ndi, wamp kᵾⱡ na ngurun ei nga, na mor kona ila rᵾp rop muⱡᵾmin. Ila molk, na nga uⱡ eng nui nim ndi, ngurun mbᵾ kᵾneing. Nambuⱡ emel, muⱡ mᵾi raⱡ pi nᵾpi kᵾn, nim ndi, na numan ngurun. 25 Uⱡ kun kai mbᵾ nga Wuta, mᵾi kona wamp mbᵾ ndi, nim pili napᵾtmᵾn. Na ndi, nim nga pᵾⱡ ei pᵾt. Wote nim ndi, na tᵾkᵾn mundrun uⱡ ei, wamp kᵾⱡ ndi pᵾtmᵾn. 26 Na ndi, nim nga mbi ei, wamp kᵾⱡ kᵾn, etᵾp tᵾp pena ila mot ndur. I et ei mel, rᵾk rᵾk etamba. Nim ndi, na numan ngurun uⱡ ei, wamp kᵾⱡ kᵾn, i ku etpa piyangga! Wote na wamp kᵾⱡ kᵾn muⱡimp,” nitim.